Momentum XXXII

Почнува да разденува. Имаат подочи од неспиење.

Глас 3

Време е да ја добијам главната улога. Меѓу очите авторот треба да нацрта длабока бразда за да не се измешаат. И пак да потсетам: ги почнавме умирањата, а за љубовта малку разговаравме. Ниту едно драгоцено искуство.

Глас 7

Еве јас. Луѓето одат в планина не само заради чист воздух, туку и за страсти. Ќе навлезат в шума, мажи и жени и невини девојки, и ќе легнат под некое дрво. Пред тоа ќе се соблечат голи. Облеката ќе ја остават во ред до нив, за да им остане испеглана. Иако редот не е вавежн, туку страста.

Глас 8

Сакаш да кажеш дека страста е еднаква со природа која умее да ја брани својата природност и природната состојба на телото?

Глас 7

Сакам.

Разговор во три очи

Само јас и ти во
плотска страст
разбираме
ваква игра!

Во првото срце,
во второто мир,
а третото бело.

Првото скока,
вика ав,
второто сонува,
а третото бело.

Првото вели
прво тоа,
второто итн,
а третото бело.

И
да појаснам:
Станува збор за
важен разговор
оти сум жеден
да те видам
со сон и љубов
ноќе.